Bakit palaging nauuhaw? Dahilan ng madalas pagkauhaw

Mahalaga ang paginom ng tubig sa ating katawan at kalusugan. Normal din na mauhaw, dahil senyales ito sa utak na kelangan ng ating katawan ng tubig. Ngunit ang sobrang pagkauhaw o uhaw na di mapawi-pawi ay maaaring senyales ng iilang problema ng katawan. Halimbawa, maaaring kakatapos lang uminom ng tubig ay nauuhaw na agad.

Narito ang iilang posibleng dahilan kung bakit di mapawi ang uhaw:
 
Diabetes
Kapag madalas mauhaw, maaaring senyales ito ng diabetes, lalo na kapag madalas naiihi, pagod at bumababa timbang ng walang dahilan. Kapag may diabetes, nahihirapan ikontrol ng katawan ang antas ng sugar sa katawan, kaya’t kelangan ng mas maraming tubig para maihi ang sugar o glucose sa katawan.
Mabuting magpatingin sa doctor kapag nakaranas ng mga sintomas na ito.
 
Inumin
Kapag umiinom ka ng maraming kape o inumin na may caffeine, mas mabilis ka maihi at maubusan ng tubig, kaya’t mabilis mauhaw. Nakakauhaw din ang paginom ng softdrinks.
 
Buntis
Senyales rin ng pagbubuntis ang madalas mauhaw at madalas maihi. Kaya’t kapag nakumpirma na buntis, karaniwan madalas mauhaw, at kadalasan ay di kelangan mabahala.
Ngunit maaaring senyales din ito ng gestational diabetes, o diabetes ng mga nagbubuntis. Kaya’t mabuting magpatingin sa doctor, upang makasiguro.
 
Asin
Kapag napansin mo madalas ka ngayon mauhaw, maaaring madami kang nakain na asin. Nakaka-dehydrate ang asin, at kelangan uminom ng mas maraming tubig para lumabnaw ang asin sa katawan. Ganun din kapag kumakain ka ng maraming maanghang na pagkain o matamis na pagkain.
 
Temperatura – Kelangan ng mas maraming mainom na tubig kapag nakatira sa mainit na lugar tulad ng Pilipinas. Lalo na tuwing tag-init o summer. Ganun din kapag madalas nasal abas ng bahay at nakabilad sa araw.
Mas kelangan din ng tubig kapag nakatira sa mataas na bundok.
 
Gawain – Kapag madami kang pisikal na gawin buong araw o madalas nakatayo o naglalakad, kakelanganin mo ng mas maraming tubig, kumpara sa taong madalas lang nakaupo. Ganun din kapag nag-ehersisyo ka o may mabigat na trabaho, kakelanganin ng katawan ng mas maraming tubig.
 
Sakit – Kapag merong impeksiyon sa katawan o lagnat o trankaso, mas mabilis mamawalan ng tubig sa katawan. O lalo na kapag nagsusuka at nagtatae, kakelanganin uminom ng mas maraming tubig.
 
Gamot na Iniinom
Maaari na ang side effect ng paginom ng gamot ang sobrang pagkauhaw. Halimbawa, may mga gamot na may diuretics na nakakaihi. Mahalagang kausapin ang iyong doctor, upang mapagusapan kung kelangan palitan ang gamot na iniinom.
 
Dehydration
Siyempre, mauuhaw ka kapag kaunti lang nainom mo na tubig na kelangan ng katawan, kaya’t dehydrated ka. Kelangan ng katawan ng mga 8-10 basong tubig kada araw. Mabilis rin madehydrate kapag may diarrhea o nagtatae.