Ok, so ang bata ay blood relative mo din. Ang dapat na gawin mo ay kumuha ng abogado sa Pilipinas para ikaw ay tulungan mag-file ng petition for adoption. Mahaba-habang proseso ito kasi, una sa lahat, kailangan mong mag-file ng petition para mag-order ang hukuman dito sa Pilipinas sa DSWD na ikaw ay imbestigahan. Iimbestigahan ang mga magulang ng bata at ang mga kadahilanan kung bakit sa iyo lumaki ang bata, kung bakit ikaw ang nagpalaki. Magsasagawa ng assessment sa inyong psychological at emotional na mga aspeto upang makita kung ikaw nga ba ay karapatdapat na maging magulang.
Ang isang kumplikasyon ay ang iyong tirahan ay nasa Japan. Hindi mo na-mention kung ikaw ay single or ikaw ay may partner o spouse sa Japan. Kasi, pati ang mga ito ay kailngang usisain ng hukuman. Ang mangyayari niyan, kailangang mag-apply ka rin sa Japan ng adoption para ang social services ng Japan ay magsagawa din ng study sa iyong living conditions kung ito ba ay mainam para sa isang 7 years old na bata. Titignan kung ang bata ay may sariling silid, kung ang iyong kita ay sapat na sumuporta sa pangangailangan ng isang bata. Kung ikaw ay may partner, o kaya'y ikaw ay kasal, malamang sa tignan din kung fit na maging parent din ang iyong partner/spouse. Sa Pilipinas, kung ikaw ay may-asawa o may kinakasama, kailangan din ng consent niya, o di kaya'y kailangang ang adoption ay joint ninyong gagawin.
Mahigpit na kasi ngayon. Mayroon na kasing UN Convention laban sa human trafficking. Ang mga ibang sindikato kasi, nag-a-adopt ng mga bata na siya naman nilang ginagamit sa prostitusyon sa Europa at sa ibang bansa. Kaya, bukod sa blood relations, kailangang din both countries (Japan at Philippines) ay ma-satisfy na hindi human trafficking ang dahilan ng pag-aampon mo sa pamangkin mo.
Kumplikado ang proseso sa adoption sa ngayon. Kung ikaw ay single, mas madali sana lalo na't kamag-anak mo naman ang bata. Ang problema nga lang, ang trabaho mo ay sa Japan. Lalaki ang isang Pilipinong bata sa Japan at ang kanyang salita, kultura at pananaw sa buhay, hindi na Pinoy, siya ay Hapon kasi doon siya lalaki. Ito ay malamang na maging concern ng husgado. Dahil din sa single ka, kung magkasakit ka, ikaw ay malayo sa mga kamag-anak mo sa Pilipinas -- sino ang titingiin sa bata kung ikaw ay magka-sakit o mapinsala? Ito ay isa ring concern ng husgado. Kailangang pag-usapan niniyo ng abogado mo ang mga bagay na ito na tiyak ay tatanungin din ng husgado sa iyo.
Yung iba, dahil sa ayaw nila ng kumplikasyong ganito, ang ginagawa na lamang ay ipinapa-late-registration ang bata at saka nila ipinarerehistro nila ang bata sa kanilang pangalan bilang magulang -- ito ay illegal at kapag ikaw ay nahuli, may kulong ito bukod pa sa maaaring ihiwalay ang bata sa iyo. Ang mas maganda ay humanap ka ng abogado na ang specialization ay adoption. Kung ikaw ay immigrant na sa Japan, at ikaw ay married sa isang Japanese national o Japanese citizen, malamang sa ito ay sumailalim sa saklaw ng inter-country adoption.
Sorry at hindi kita mabigyan ng definite na information dahil na rin sa maraming mga mahalagang facts na hindi naibigay sa iyong katanungan. I wish you the best of luck.