Ano pwede gawin upang mapaalis sa aking bahay? My husband has been married before and they are living at my house

Ang sabi mo, matagal na kayong nag-sasama ng iyong asawang lalake sa iisang bahay. Pero nalaman mong siya'y may asawang una pa sa iyo at may anak pa siya doon. Ang tanong ko lang, dahil sa ito'y hindi masyadong klaro sa isip ko -- kasal ba kayo? O kayo ba'y nagsasama lamang? Iyon bang asawa sa una noong iyong asawa, sila ba'y kasal din?

kaya ko naitanong, kasi, kung kayo'y kasal at may ibang babaeng pinakasalan ang asawa mo at ang kanyang kasal doon sa ibang babae ay nauna doon sa kasal ninyo, ang kasal mo ay void.

Kung hindi naman kasal ang lalake doon sa ibang babae, unless may pruweba kang sila'y gumagawa ng iskandalo at nagsasama bilang mag-asawa habang siya'y kasal sa iyo at habang ikaw ay nagpapaka-pagod sa pagkayod sa abroad, maaari mo siyang kasuhan ng adultery. Yung kaso ay isang kriminal na asunto. Siyempre, kapag huhulihin at ikukulong ang asawa mo, mapapa-alis mo na siya sa bahay.

Dahil sa hindi malinaw ang mga detalye ng iyong kuwento, hindi kita masagot ng masinsinan. Kung gusto mong paalisin ang iyong asawa (lalo na't hindi naman pala kayo kasal), gumawa ka ng Special Power of Attorney sa isang pinagkakatiwalaang kamag-anak. Bigyan mo siya ng kapangyarihang ipa-upa ang bahay na iyon sa iba at kapangyarihang magsampa ng kasong ejectment laban doon sa lalake (iyon ay kung kayo'y hindi kasal).

Ito pa ang detalye na hindi mo inilagay-- ang bahay ba ay rehistrado sa ilalim ng sistemang Torrens? May titulo ba ang bahay at lupang kinatatayuan nito? Ikaw ba ang registered owner nito? Nakalagay ba na ikaw ay 'married to' sa iyong asawa? kasi, kung nakalagay na ikaw ay 'married to' ibig sabihin, ang bahay at lupa ay nabili at nai-pa-rehistro noong kayo'y kasal na. May punto siya na sabihin na may ipinundar siya doon kasi'y sa ilalim ng batas, ang mag-asawa ay may conjugal partnership o absolute community ng mga property. So, kailangan mo pang i-prove na ikaw lang ang nagta-trabaho at ang lalaki ay iyong palamunin lamang upang masabing ang bahay ay talagang sa iyo lamang. Ang prueba mo dito'y ang mga titulo, tax declaration na dapat ay lahat nasa pangalan mo.

Sa madali't sabi, kailangang mag-sampa ka ng kaso laban sa lalaking iyon para maideklara ang kawalan ng bisa ng inyong kasal (absolute nullity). Kung hindi naman kayo kasal, maaari mong paalisin siya pero magsasampa ka pa rin ng kaso.

Ang pinaka-maigi ay kumuha ka ng abogado dito sa Pilipinas upang ikaw ay mabigyan ng tamang advice. Dito kasi sa internet, kulang ang mga detalye kaya't hindi kita masagot ng tuwiran.