Ano ang kahulugan ng Rhythm o Calendar Method na Natural Family Planning?
Ang “Rhythm method” o (Calendar method/Calendar Rhythm method/Standard Days method) ay isang uri ng natural na family planning. Ang Natural Family Planning o NFP ay ang tawag sa kabuuan sa mga pamamaraan ng pagpaplano ng pamilya na naaayon sa natural at moral na mga prinsipyo ng mga mag-asawa upang hindi makapagbuntis o magbuntis ang kabiyak. Ang NFP ay hango sa obserbasyon sa mga natural na pangyayaring nararamdaman at sintomas kung kalian pinaka-fertile o mabunga ang isang babae. Upang magamit ang rhythm method, kailangan subaybayan at obserbahan ang “pattern” kung kailan nag-oovulate o mabungang-mabunga ang babae. Ito ay nakakatulong upang malaman mo kung kailan pinakamataas ang tsansa mong makapag-dalang-tao. Kung umaasa kang magka-anak, maaari mong magamit ang rhythm method upang matukoy kung kalian ka makikipagtalik. At sa isang banda, kung iniiwasan mo pang magbuntis, upang malaman kung kailan ka iiwas muna sa pakikipagtalik. Ang paggamit ng “rhythm method” sa pagkontrol ng pagbubuntis ay nangangailangan ng wastong pagtatala sa mga sintomas at pagiging matiyaga. Kung hindi mo gustong mabuntis, ang iyong kabiyak ay dapat umiwas munang makipagtalik o kaya’y maaari siyang gumamit ng proteksyon sa mga araw na “fertile” o mabungang-mabunga ang babae
Paano ginagawa ang Rhythm o Calendar Method?
Ang Rhythm method ay itinatayang 95 porsyentong epektibo. Kailangan ng kooperasyon ng bawat mag-asawa upang maging matagumpay ang ganitong pamamaraan.
Mayroong tinatawag ding “Standard Days Method” o SDM, sa mga babaeng may “menstrual cycle” na 26 hanggang 32 ka araw lamang ito gumagana. Upang magamit ang ganitong paraan, ang mag-asawa ay hindi nagtatalik sa ika-walong araw hanggang ika-labing-siyam na araw sa menstrual cycle ng babae. Kapag ang babae ay mayroong higit sa isang cycle sa isang taon na mas maiksi kaysa sa 26 na araw, o kaya nama’y mas matagal sa 32 ka araw, ang lebel ng pagka-epektibo ng pamamaraan ay nababawasan.
Paano Ginagawa ang Standard Days Method (SDM)?
Sa isang ordinaryong kalendaryo, markahan ang araw ng una mong buwanang-daloy at markahan ito bilang Day 1 at bilugan. Pagkatapos ay sa kaparehong araw sa sumunod na linggo, lagyan ito ng Day 8 at bilugan. Bumilang ng isang araw lamang patungo sa Day 19 at bilugan. Markahan ng makapal na linya ang araw mula sa 8, 9, 10, 11, 12, 13, 14, 15, 16, 17, 18, at 19. Para sa labing-dalawang araw na ito, umiwas muna sa pakikipagtalik kung hindi mo pa gustong mabuntis. Ang ikawalo hanggang ika 19 na araw ay mga araw na mataas ang iyong fertilidad at ang puruhan na mabuntis. Ang ibang araw sa loob ng cycle ay maliit ang tsansa na makapag-buntis. Kaya naman hindi kailangang umiwas sa pakikipagtalik sa mga araw na ito. At kung kalian nagsimula ulit ang iyong sumunod na pagdurugo, markahan ito ng Day 1 sa bagong cycle. At gawin ulit ang nauna nang mga nasabi sa itaas. Lagyan ng parisukat ang bilang ng araw sa bawat cycle. Kaya naman dapat palagi kang may record ng iyong cycle. Kapag ang cycle ng iyong buwanang-daloy ay lumagpas sa 32 ka araw o mas mababa sa 26 ka araw ay dapat pumili ng iba pang natural family planning.
Mga Pwedeng Asahan sa Standard Days Method o SDM
Upang magamit ang pamamaraan na ito, kailangang:
· I-record ang haba ng iyong buwanang-daloy sa loob ng 6 hanggang 12 beses na menstrual cycles.
· Dapat mo ring malaman ang pinaka-maiksing bilang ng araw ng iyong buwanang-daloy. Bawasan ng 18 ang bilang ng araw ng pinamaiksing cycle na ikaw ay pinaka-“fertile”. Ang resultang numero ay ang bilang ng araw na ikaw ay napaka-“fertile”.
· Kailangan ring tukuyin ang pinakamatagal mong menstrual cycle. Bawasan lamang ito ng 11 at ang resulta ay nag-rerepresanta sa huling mga araw ng iyong “fertle days”. Halimbawa, kung ang iyong pinakamahabang cycle ay 32, bawasan ng 11, ang resulta ay 21. Sa halimbawa na ito, ang Day 21 ay ang huling araw na ikaw ay fertile.
· Planuhing mabuti ang pakikipagtalik lalo na sa “fertile days”.
Ang kailangan lang tandaan ay maraming mga “factors” na maaaring maka-apekto sa oras ng “ovulation” o ang pag-mature ng itlog ng babae. Kaya naman kung irregular ang iyong “menstruation” ay hindi ito magiging epektibo nang lubusan.
