Ano ang Tama at Maling Kulay ng Dumi

Normal ba ang aking dumi? Tama ba ang kulay o kelangan ko mabahala? Madalas iba-iba ang kulay ng dumi. At di natin alam kung ok ba ang color o may mali ba ito.
 
Ayon sa mga eksperto, may mga senyales o palatandaan na binibigay ang kulay ng ating dumi. Minsan maliit na problema lamang, ngunit pag di naagapan, maaaring lumala. Kaya’t mas maigi kung alam natin kung ano ang bakas na binabatid ng mga kulay ng dumi tulad ng berde, dilaw, itim, brown o pula.

Narito mga maaaring kahulugan ng iba’t ibang kulay ng dumi:
 
Brown – Normal na kulay ng dumi ang kayumanggi o kulay kape. Ngunit di yung sobrang brown na paitim na ang kulay.
 
Itim – Unang una, pag black ang kulay ng dumi, maaaring may nakain ka na maitim o sanhi ng nainom na gamot o supplement. Sa mga bagong panganak na sanggol, normal din na itim ang dumi sa umpisa. Ngunit maaari ding senyales ng karamdaman ang itim na dumi. Halimbawa pagdurugo sa may tiyan o laman loob.
 
Dilaw – Maaaring makasanhi ng yellow na dumi ang mga kinakain. Halimbawa, ang kamote at luyang dilaw. Maaari ring nahihirapan ang mga may celiac disease na maka-proseso ng gluten, tulad ng tinapay, pasta at cookies. O maaari ring sanhi ito ng maraming nakain na matatabang pagkain. Subukang bawasan ang mga pagkain na may taba, mga processed foods, at gluten. Mabuti ring magpatingin sa doctor, lalo na pag madalas makaranas ng yellow na dumi.
 
Berde – Pag green ang iyong dumi, maaaring dahil nagtatae ka o masakit ang tiyan o kaya hindi makadumi. Ang tawag dito sa mga problema ay irritable bowel syndrome. Ngunit kadalasan, pag wala ka naman nararamdaman ng pananakit ng tiyan, di naman nakakabahala ang berdeng dumi. Dahil maaaring sanhi lamang ito ng nakain na gulay tulad ng spinach o kaya ay food coloring ng pagkain. Maaaring dahil din sa iron supplements na iniinom.
 
Maputla – Pag maputla ang dumi, maaaring sanhi ito ng problema o sakit sa atay, tulad ng hepatitis. Maaaring sanhi rin ito ng bato sa apdo o gallstones.
 
Pula – Pag may pula sa iyong dumi, wag kaagad maalarma, dahil maaaring sanhi ng nakain na mapula, tulad ng kamatis o pulang gulaman. Ngunit kapag wala naman nakain na pula, kumonsulta kaagad sa doctor, dahil maaaring sanhi ito ng sakit tulad ng almuranas o pamamaga ng bituka. Maaaring senyales din ito ng tumor o cancer.  
 
Sa madaling salita, pag maputla, mapula o maitim ang iyong dumi, magpatingin kaagad sa doctor. Ngunit kapag madalas rin nagiiba ang kulay ng dumi, mabuti ring magpakonsulta sa doctor.