Ano ang paraan para mapaupa o renta ang isang lupang rights lang ang nabili?

Hindi kasi malinaw sa akin ang ibig mong sabihin na "rights" lang ang inyong nabili. Kalimitan kasi ng mga taong nagsasabi nito, ang kanilang tinutukoy ay mga lupang awarded ng NHA para sa mga urban poor, informal settlers, o biktima ng mga kalamidad na nabigyan ng pabahay. Mayroon namang mga tao na bumibili ng rights sa mga pabahay na dapat ay para sa mga sundalo, guro, o iba pang mga kawani ng gobyerno na may murang pabahay. So, hindi ko sigurado kung alin sa dalawang ito ang iyong tinutukoy.

Ang problema kasi dito, kung ang lupa ay awarded ng NHA, may kundisyon ang pag-award ng lupa -- ang kundisyon ay, hindi maaaring ibenta ng Awardee ang lupa sa kahit na kanino habang hindi pa ito tapos bayaran. So, malamang sa ilalim ng ganitong situwasyon, ang lahat ng papeles pati na ang titulo ng lupa at mortgage ay nasa pangalan ng Awardee. Hindi ninyo ito mailipat sa pangalan ninyo hangga't sa hindi ito fully paid.

Maaaring i-fully pay ninyo ito, tapos ay ipalipat sa pangalan ninyo ang titulo. Puede din naman na mag-pa gawa kayo at magpa-pirma kayo ng SPA doon sa Awarded para kayo ang magkaroon ng power na makipag-trato at makipag-transaksiyon sa gobyerno para mapatayuan na ng apartment na paupahan ang inyong nabiling lupa.

Kailangan ninyo ng building permit so it ay sa City Engineer's Office. Kailangan din ninyo ng clearance mula sa iba't ibang ahensiya sa munisipyo (fire department para sa electrical wiring, etc.) at kailangan ding idecklara ninyo ang value ng bagong itatayong gusali para ito ay mabuwisan o real property tax sa munisipyo ninyo.

Sa bawat munisipyo ngayon, may mga one-stop shop silang tinatawag. Doon na lamang kayo pupunta at magta-transaksiyon. Pumunta po kayo't makipag-ugnayan sa inyong munisipyo.