Suporta ng nagtatrabahong anak sa Amang senior citizen

Una po, ang support po ay talagang obligasyon ng magulang para sa mga anak sa ilalim ng batas. Wala po tayong batas na nagsasaad na kailangang suportahan ng mga anak ang kanilang mga magulang.

Tayo pong mga Pilipino, kultura po natin na suportahan ang ating mga magulang, pero ito ay ginagawa natin dahil sa ating kultura, palaki at sa sariling pananaw at kumbiksiyon na ito ang nararapat na pag-tanaw ng utang na loob sa magulang. Hindi po ito maipipilit sa ilalim ng batas (ibig po sabihin ay hindi kayo puedeng mag-habla laban sa mga anak).

Ngayon po, ang puede po ninyong gawin ay diskarte. Mag-xerox po kayo ng mga resibo sa gamot nila. Ito po ay ipadala sa mga anak. Kailangan din po, magbukas ng bank account (may mga banko po na P200 daan lamang ay may puede na silang account). Kahit $10 every month ang bawat isang anak, maghulog o magdeposito sa account noong matanda, okay na.

Ang problema po kasi minsan, ang mga anak, busy sa trabaho at sa pamilya nila. Mahirap sa kanila na magpadala ng pera (sa Western Union o sa iba pang remittance company) kung maliit lang din naman ang kanilang ipapadala, ay magbabayad pa sila para maipadala ito. Kung may bank account po ang senior, puedeng hulugan o depositohan ng mga anak niya ang account buwan-buwan, kahit maliit na halaga lamang.

Sa Office of Senior Citizens Affairs po, may programa po ang pamahalaan na 4Ps na naglalayong magbigay ng pera para sa mga senior. May libreng gamot na maintenance din sa mga health center. At, may libreng Philhealth card po ang mga senior. Kailangan din pong magpa-rehistro para magka-ID. Sa gayon, may magagamit sa oras ng pangangailangan.

Nagtrabaho po ba ang senior noong siya'y bata pa? Siya po ba ay miyembro ng SSS o Philhealth o Pag-ibig? Kasi po ay baka may mga benepisyo po siyang matatamo mula sa mga ahensiyang ito. Dapat po ay i-explore ang mga bagay na ito.

Ito po ang isang problema ng mga Pilipino, nagta-trabaho po sila, hindi nila iniisip na isang araw, tatanda din sila, magkaka-sakit. Kailangan po ay paghandaan ang mga bagay-bagay na ito. Good luck po.